Nyota wa klabu ya Paris Saint Germain (PSG) ya nchini Ufaransa, – Neymar amesema kuwa kuchezea timu ya Real Madrid ni miongoni mwa mambo yanayovutia wachezaji wengi, na yeye anaweza kujiunga na miamba hiyo ya Hispania.
Neymar amesema pamoja na kuwa na furaha ndani ya PSG, lakini wachezaji wengi ambao wamekuwa wakitakiwa na Real Madrid imekuwa ni vigumu kukataa kujiunga nayo kutokana na ukubwa wa historia ya klabu hiyo.
Nyota huyo raia wa Brazil anayeuguza majeraha kwa sasa, amesema hana haraka ya kuondoka ndani ya PSG hata kama Madrid itamtaka lakini hajui nini kitatokea baadaye.
Neymar ndiye mchezaji anayeshikilia rekodi ya mchezaji ghali zaidi duniani baada ya kujiunga na PSG kwa dau la Euro Milioni 222 akitokea FC Barcelona mwaka 2017 na kwa muda mrefu amekuwa akihusishwa kurudi nchini Hispania kujiunga na Real Madrid.
