Waziri wa Afya, Maendeleo ya Jamii, Jinsia, Wazee na Watoto, Ummy Mwalimu ametembelea ujenzi wa hospitali mpya ya rufaa ya mikoa ya kusini iliyopo Mtwara na kuridhishwa na kasi ya ujenzi.
Ujenzi wa hospitali hiyo ambao umefikia asilimia 80 unagharimu shilingi bilioni 15.8 mpaka kukamilika kwake.
“Kukamilika kwa hospitali hii kutasaidia kupunguza rufaa kwa wananchi wa mikoa ya kusini kwenda kutafuta huduma za kibingwa Muhimbili, MOI au JKCI, huduma zitakua zinapatikana hapa,” amesema Waziri Ummy.
Amesema lengo la Wizara ya Afya ni kuona huduma zinaanza kutolewa katika hospitali hiyo kabla ya kuanza kampeni za uchaguzi mwaka huu kwani ilikua ni ahadi ya Rais Dkt. John Pombe Magufuli alipopita mwaka 2015 kuomba kura na hospitali hiyo ipo kwenye utekelezaji wa ilani ya Chama cha Mapinduzi.
“Hatutaki watu wa Mtwara na mikoa ya kusini kwa ujumla muende Dar es Salaam kwa ajili ya kufuata huduma za CT-Scan, huduma za madaktari bingwa ikiwemo upasuaji wa mifupa, mishipa ya fahamu, madaktari wa watoto na uzazi. Huduma zote hizi zitapatikana hapa mara baada ya ujenzi wa hospitali hii kukamilika,” amesisitiza Ummy.
Ameongeza kuwa kwa ujumla hali ya sekta ya afya mkoani Mtwara ni nzuri ambapo katika kipindi cha miaka mitano hospitali mpya za wilaya tatu zimejengwa ambazo ni Nanguluwe, Nanyamba pamoja na Masasi.
Aidha, vituo vya Afya vinane vimejengwa katika mkoa huo katika kipindi hicho na kufanya idadi kufikia vituo 23 kutoka 15 wakati Rais Magufuli akiingia madarakani.
