Jeshi la Polisi mkoani Kagera linawashikilia watu Wanne kwa tuhuma za kukutwa na dawa za kulevya aina ya Heroine katika kata za Hamugembe na Nshambya kwenye Manispaa ya Bukoba.
Kamanda wa Polisi wa mkoa wa Kagera, – Revocatus Malimi amesema kuwa watuhumiwa hao wamekamatwa kufuatia msako uliofanywa na jeshi hilo.
Kamanda Malimi amewaambia waandishi wa habari Mjini Bukoba kuwa Watuhumiwa hao ni pamoja na Salum Said Mkazi wa Tabata jijini Dar es salaam na Hussein Hassan Mkazi wa Hamugembe Manispaa ya Bukoba ambao wanadaiwa kukutwa na Kete Tisa za Heroine .
Wengine ni Stephano John na Ardin Rugaimukamu ambao wana umri wa miaka Ishirini na Miwili kila mmoja na wamekamatwa katika eneo la Migera Manispaa ya Bukoba wakiwa na kete Ishirini na Tatu za dawa hizo za kulevya.
Wakati huohuo, Jeshi la Polisi mkoani Kagera linawatafuta watu Wanane wanaosadikiwa kuwa ni majambazi wanaodaiwa kuhusika na tukio la utekaji wa magari mawili ya abiria pamoja na unyang’anyi katika eneo la Kalenge kata ya Lusahunga wilayani Biharamulo.
Watu hao pia wanadaiwa kujeruhi abiria wawili kwa risasi na kisha kuwanyang’anya mali pamoja na fedha taslimu zikiwa na thamani ya zaidi ya shilingi Milioni Tatu.
