Roger Federer ametinga hatua ya robo fainali ya mashindano ya wazi ya Tenisi ya Miami (Miami Open) kwa kumtandika kwa seti Mbili kwa Bila Daniil Medvedev wa Russia katika mchezo wa hatua ya 16 bora.
Bingwa huyo wa mataji Matatu ya mashindano hayo, amepata ushindi 6-4 na 6-2 akitumia muda wa saa Moja na dakika Moja kujihakikishia nafasi ya kucheza robo fainali ya mshindano hayo ambayo mara ya mwisho aliibuka bingwa mwaka 2017.
Federer atamenyana na Kevin Anderson wa Afrika Kusini kwenye robo fainali, baada ya Anderson kuibuka na ushindi wa seti Mbili kwa Bila za ushindi wa 7-5 na 7-5 dhidi ya Jordan Thompson wa Australia kwenye mchezo wa hatua ya 16 bora.
Akizungumzia mchezo huo wa robo fainali, Federer amesema kuwa Anderson ni mchezaji mzuri na amekuwa mwepesi wa kujibu mashambulizi, hivyo anaamini mchezo huo utakuwa mgumu ingawa Anderson ameshinda mchezo Mmoja tu kati ya Sita aliyokutana na Federer.
Kwa upande wa Wanawake, Mwanadada Simona Halep wa Romania anakaribia kupanda hadi katika nafasi ya kwanza kwenye viwango vya ubora baada ya kutinga hatua ya nusu fainali ya michuano ya wazi ya Miami.
Halep ametinga hatua ya nusu fainali kwa kumnyuka Wang Qiang wa China kwa seti Mbili kwa Bila za ushindi wa 6-4 na 7-5 na anatakiwa kufuzu hatua ya fainali ili kumng’oa Naomi Osaka wa Japan katika nafasi ya kwanza kwenye viwango vya ubora.
Katika hatua ya nusu fainali Halep atakutana na mshindi wa robo fainali kati ya Karolina Pliskova na Marketa Vondrousova, wote kutoka Jamhuri Czech huku nusu fainali nyingine ikiwakutanisha Anett Kontaveit wa Estonia na Ashleigh Barty wa Australia.
