Shirika la Umoja wa Mataifa la Kuhudumia Watoto (UNICEF) limesema kuwa lina wasiwasi na usalama wa watoto wanaoishi katika kambi za wakimbizi nchini Iraq, katika kipindi hiki ambapo nchi hiyo inaelekea katika msimu wa baridi kali.
Katika taarifa yake UNICEF imesema kuwa ina wasiwasi kuwa watoto wengi wanaweza kufa kwa baridi kali, kwani kambi hizo za wakimbizi haziwezi kuhimili hali hiyo ya baridi, ikizingatiwa kuwa katika siku za hivi karibuni Iraq ilikumbwa na mafuriko makubwa.
Mafuriko hayo yaliwaathiri wakimbizi wanaoishi kwenye kambi mbalimbali za wakimbizi nchini humo, ambao wamekuwa wakiishi kwenye mahema ya muda ambayo hayawezi kuhimili mvua na baridi kali na watoto wakiwa katika hatari kubwa zaidi.
