Mzunguko wa 25 wa Ligi Kuu Soka Tanzania Bara unaendelea kuanzia katikati hadi mwishoni mwa juma hili, kwa kuchezwa michezo kadhaa kati ya siku ya Jumatano na Jumamosi.
Singida United wakiwa kwenye dimba lao la nyumbani, watawaalika vinara wa ligi hiyo Yanga kwenye mchezo utakaopigwa siku ya Jumatano Februari Sita.
Siku hiyo hiyo ya Jumatano itashuhudiwa michezo mingine miwili, ambapo JKT Tanzania watawaalika Biashara United ya Mara kwenye dimba la Meja Jenerali Mstaafu Michael Isamuhyo, huku matajiri Azam FC wakiwakaribisha Alliance FC kwenye uwanja wa Azam Complex.
Alhamisi Februari Saba, itachezwa michezo miwili ambapo Coastal Union watapepetana na wazee wa kupapasa – Ruvu Shooting Stars huku bingwa mtetezi Simba ikimenyana na Mwadui FC kwenye dimba la Taifa jijini Dar es salaam.
Siku ya Ijumaa kutakuwa na mchezo mmoja sawa na Jumamosi ambapo Mtibwa Sugar watakuwa kwenye uwanja wao wa nyumbani wa Manungu mkoani Morogoro kukipiga na African Lyon huku JKT Tanzania wakiwa ni wenyeji wa Yanga kwenye uwanja wa Mkwakwani jijini Tanga.
